صحیح مخارج کے ساتھ قرآن پاک کا حفظ، عصری پرائمری علوم، شبانہ علمی مذاکرات اور اخلاقی تربیت کا ہمہ جہت نظام
مدرسہ قاسمیہ بینی آباد میں حفظ قرآن و تجوید کا عمدہ اور سخت ترین نظم ہے۔ یہاں طلبہ کو تجوید کی بنیادی اور ضروری قواعد کے ساتھ حفظ کرایا جاتا ہے تاکہ اگر کوئی بچہ حفظ کے بعد تجوید و قرأت کی باضابطہ تعلیم نہ حاصل کر سکے تو بھی اس کی تلاوت درست رہے۔ حفظ کے طلبہ کو روزانہ دینیات اور اردو کی تعلیم بھی دی جاتی ہے۔
مدرسہ قاسمیہ کے شعبہ پرائمری میں ناظرہ قرآن مجید کے ساتھ دینیات، اردو، ہندی، انگریزی، حساب، اور جغرافیہ و دیگر عصری علوم کی تعلیم درجہ بندی کے ساتھ دی جاتی ہے۔ نصاب تعلیم درجہ پنجم (Class 5) تک ہے، اس نصاب کی تکمیل کے بعد اگر کوئی طالب علم اسکول کی تعلیم حاصل کرنا چاہے تو آسانی کے ساتھ مڈل اسکول کے چھٹے یا ساتویں کلاس میں داخل ہو سکتا ہے۔
بینی آباد کے اطراف و اکناف میں مسلمانوں کی کچھ ایسی بستیاں بھی ہیں جہاں کے لوگ مالی بحران، غربت، افلاس اور دینی کم ہمتی کی وجہ سے اپنی آبادی میں بچے اور بچیوں کے لیے قرآن کریم اور دین کی تعلیم کے لیے مکتب قائم نہیں کر پاتے تھے۔ نسلوں کے دینی خسارے کو روکنے کے لیے مدرسہ قاسمیہ نے متعدد پسماندہ بستیوں میں باضابطہ مکاتب قائم کیے ہیں۔
نئی نسل کی عصری علوم اور اسکولوں کی طرف بڑھتی دلچسپی اور قرآن پاک کی تعلیم سے دوری کے پیش نظر، صبح سویرے اسکول، کانونٹ، کوچنگ سینٹر، اور نرسری جانے والے طلبہ و طالبات کے لیے صباحی اور مسائی مکتب کا نظام قائم کیا گیا۔ الحمد للہ اس سے بڑی تعداد میں بچے مستفید ہو رہے ہیں اور ان کا ایمان و عقیدہ محفوظ ہے۔
امتحانی ہال
تمام درجات کے طلبہ کا منظم تحریری جائزہ اور شفاف تعلیمی نظام
حفظ قرآن
۱۵ سرگرم حلقات میں طلبہ یومیہ سبق، سبقی اور منزل کی پختگی کرتے ہیں
شبانہ مطالعہ
عشاء کے بعد اساتذہ کی زیر نگرانی اسباق یاد کرنے اور دہرانے کا عمل
تاریخی حفظ ہال
سفید لباس میں طلبہ کا منظم حلقہ، سبق اور تکرار کی پرانی تعلیمی روایت
کلاس روم
ناظرہ، اردو، حساب اور عصری مضامین کی باقاعدہ کلاس روم تعلیم
فجر کی نماز کے بعد تعلیم شروع ہونے سے قبل تمام اساتذہ و طلباء سورہ یٰسین شریف کی تلاوت کرتے ہیں، ختم تلاوت کے بعد اسلام اور شعائر اسلام کی بقا و تحفظ اور پوری دنیا کے مدارس و مکاتب و روحانی خانقاہیں، ادارے کے ساتھ دامے، درمے، سخنے، قدمے تعاون کرنے والے مخلصین کے لیے خاص دعاؤں کا اہتمام کیا جاتا ہے۔
معلم و متعلم دونوں دعوت و تبلیغ کے لیے ترتیب کے ساتھ علاقے کی بستیوں اور شہروں میں جاتے ہیں، بلکہ اس اہم مقصد کے لیے اساتذہ کرام کی ترتیب بنی ہوئی ہے کہ ہر سال چار ماہ یکے بعد دیگرے اساتذہ تبلیغ میں جاتے ہیں جس کی تنخواہ وضع نہیں کی جاتی، اس کے علاوہ خود اس گاؤں میں ہفتے کا دو گشت ہوتا ہے جس میں اساتذہ، طلبہ اور گاؤں کے لوگ شریک ہوتے ہیں۔
عشاء کی نماز کے بعد دارالاقامہ میں مقیم طلبہ کو مختلف حلقوں و گروپ میں تقسیم کر کے ہر ایک حلقے کا ایک امیر بنا دیا جاتا ہے، اساتذہ کی زیر نگرانی روزانہ مندرجہ ذیل بنیادی دینی امور کا مذاکرہ کرایا جاتا ہے:
اسلامی عقائد کی ضروری اور بنیادی چیزیں مع چھ کلمے۔
فرائض، واجبات، سنن، مستحبات، مکروہات، نماز جنازہ، دعائیں اور عیدین کے احکام۔
آداب طعام، آداب نوم، آداب کلام، آداب مجلس اور سنت نبویہ کے مطابق نشست و برخاست۔
صبح و شام کے اذکار اور روزمرہ کی تمام مسنون دعائیں مع مفہوم۔
اللہ تعالیٰ کے ۹۹ اسمائے حسنیٰ حفظ کرائے جاتے ہیں (بشارتِ دخولِ جنت کے پیش نظر)۔
نبی کریم ﷺ کی چالیس جامع احادیث مبارکہ کا حفظ اور عملی فہم۔
طلبہ کی خوابیدہ صلاحیتوں کو بیدار کرنے، انہیں درسیات کے علاوہ خارجی مطالعہ کا عادی بنانے، تقریر و تحریر کی مشق اور دعوتی کاموں کے لیے تیار کرنے کے لیے ”اصلاح اللسان“ کے نام سے طلبہ کی ایک انجمن ہے جس کے زیر اہتمام اساتذہ کی نگرانی میں طلبہ باقاعدگی سے تقریر و تحریر کی مشق کرتے ہیں۔